ನಿಸರ್ಗ ಸಂಗೀತ
© ಧನರಾಜ್ ಎಂ
ಬೆಳಗಾಗುತಲಿ ಕೇಳಿ ಬಂತು ಹಕ್ಕಿಗಳ ಚಿಲಿಪಿಲಿ…
ಕಿವಿಗಳಿಗೆ ಆನಂದ ತಂತು ಬೀಸಿ ಬಂದ ತಂಗಾಳಿ.
ಮನಸಿಗೆ ಮುದ ನೀಡುವ ಚಟಪಟ ಮಳೆಗಳ ಹನಿ,
ಮಳೆಯೊಂದಿಗೆ ಜೊತೆಯಾದವು ಕಪ್ಪೆ, ಕೀಟಗಳ ದನಿ!
ಮುಗಿಲ ಸೀಳಿದಂತೆ ಹೊರ ಹೊಮ್ಮುವ ಗುಡುಗು,
ಸಂಗಾತಿಗಳ ಸೆಳೆಯವ ಪ್ರಾಣಿಪಕ್ಷಿಗಳ ಕರೆ ಸೊಬಗು,
ದಡಕ್ಕನೆ ಬೆಚ್ಚಿ ಬೀಳಿಸುವ ಭೂಕಂಪನ,
ಬೆಂಕಿಯ ಬೇಗೆಯಲಿ ವಸ್ತುಗಳ ದಹನ!
ಎತ್ತರದಿಂದ ಧುಮುಕುವ ಜಲಪಾತದ ಭೋರ್ಗರೆತ.
ನಾ ಮುಂದು ತಾ ಮುಂದೆಂದು ಜಿಗಿವ, ಸಮುದ್ರದ ಅಲೆಗಳ ಮೊರೆತ,
ಅಲ್ಲಲ್ಲಿ ತರಗೆಲೆಗಳ ತಕಧಿಮಿತ,
ಎಲ್ಲೆಡೆ ತುಂಬಿದೆ ನಿಸರ್ಗ ಸಂಗೀತ!
ಗಾಳಿಯಲಿ ತರಂಗಗಳ ಕಂಪನ
ಎಲ್ಲದರಲ್ಲೂ ಅಡಗಿದೆ ಸ್ವರಗಳ ಇಂಪನ
ರಾಗ, ತಾಳ, ಭಾವಗಳ ಸಮ್ಮಿಲನ…
ನಿಶಬ್ದದಿ ಆಲಿಸುವ ಶಬ್ದಗಳ ಸಮತೋಲನ!
–ದೀಪಿಕಾ ಬಾಯಿ. ಎನ್.
ಬೆಂಗಳೂರು ಜಿಲ್ಲೆ
M.Sc ( ಗಣಿತ ) ಮುಗಿಸಿ, ನನ್ನಿಷ್ಟ ದಂತೆ ಶಿಕ್ಷಣ ವೃತ್ತಿ ಆರಿಸಿಕೊಂಡು, ಸರ್ಕಾರಿ ಶಾಲಾ ಮಕ್ಕಳಿಗೆ ಸೃಜನಾತ್ಮಕ ಕಲಿಕೆಗೆ ಪೂರಕವಾಗಲು ರಾಮಕೃಷ್ಣ ಮಿಷನ್ ಶಿವನಹಳ್ಳಿ ಯವರು ಆಯೋಜಿಸಿರುವ ಪ್ರೊಜೆಕ್ಟ್ ಮಾಡೂ ನಲ್ಲಿ ಕೆಲಸ ಮಾಡುತ್ತಿದ್ದೇನೆ.
ವಿವಿಧ ಶಾಲೆಯ ಮಕ್ಕಳೊಂದಿಗೆ ಚಟುವಟಿಕೆಗಳ ಮೂಲಕ ವಿಜ್ಞಾನ ಮತ್ತು ಗಣಿತದ ವಿಷಯಗಳನ್ನು ಚರ್ಚಿಸುವುದು ನನ್ನ ವೃತ್ತಿ ಮತ್ತು ಪ್ರವತ್ತಿ ಕೂಡ ಹೌದು .ಚಿಕ್ಕ ಕಥೆಗಳು ಮತ್ತು ಕವನಗಳು ಬರೆಯುವುದು ,ಚಿತ್ರಕಲೆ ನನ್ನ ಹವ್ಯಾಸ ಗಳು.
ಚಿಕ್ಕ ವಯಸ್ಸಿನಿಂದ ಬೆಂಗಳೂರಿನಲ್ಲೆ ಬೆಳೆದ ನನಗೆ ಕಾಡು ಮತ್ತು ಕಾಡು ಪ್ರಾಣಿಗಳ ಬಗ್ಗೆ ಹೆಚ್ಜ್ಚಿನ ಜ್ಞಾನ ಇರಲಿಲ್ಲ. ಆದರೆ ಈಗ ಪರಿಸರ ಕಾಳಜಿ ಹೊಂದಿರುವ ಕೆಲವು ಗೆಳೆಯರೊಂದಿಗೆ ಸೇರಿ ನನಗು ಪ್ರಕೃತಿ ಯ ಬಗ್ಗೆ ಹೆಚ್ಚು ತಿಳಿಯುವ ಕುತೂಹಲ ಬಂದಿದೆ. ಪರ್ವತಾರೋಹಣ, ಪಕ್ಷಿ ವೀಕ್ಷಣೆ, ಛಾಯಗ್ರಹಣಗಳಲ್ಲಿ ನನ್ನನ್ನು ತೊಡಗಿಸಿಕೊಳ್ಳುವುದು ನನಗಿಷ್ಟ .
