ಇರುವೆ

ಇರುವೆ ಇರುವೆ ಹೇಗಿರುವೆ
ಸಿಹಿಯನು ಹುಡುಕುತ ಎಲ್ಲಿರುವೆ
ಅಡುಗೆ ಮನೆಯ ಸಕ್ಕರೆ ಡಬ್ಬಿಯ
ತೆಗೆದರೆ ಅದರ ಒಳಗಿರುವೆ

ಇರುವೆ ಇರುವೆ ಸಾಲಿರುವೆ
ಕಬ್ಬಿನ ರಸಕೆ ಮುತ್ತಿರುವೆ
ಸಾಲು ಸಾಲು ಸೈನಿಕರಂತೆಯೆ
ಶಿಸ್ತೊಳಗೆಲ್ಲೆಡೆ ನಡೆದಿರುವೆ

ಇರುವೆ ಇರುವೆ ಎಲ್ಲಿರುವೆ
ನಿನಗೆ ಬೆಲ್ಲವ ತಂದಿರುವೆ
ಮೆಲ್ಲನೆ ಬಾ ಬಾ ನನ್ನೆಡೆಗೆ
ನಿನ್ನನೆ ನಾನು ಹುಡುಕಿರುವೆ

ಇರುವೆ ಇರುವೆ ಕಪ್ಪಿರುವೆ
ಮೊಟ್ಟೆಯ ನೀನು ಕಚ್ಚಿರುವೆ
ಮೊದಲ ಮಳೆಯ ಸೂಚನೆಯ
ನೀನೆ ನನಗೆ ತಿಳಿಸಿರುವೆ

ಇರುವೆ ಇರುವೆ ಕೆಂಪಿರುವೆ
ನಿನ್ನನು ಕೆಣಕಿರೆ ಕಚ್ಚಿರುವೆ
ಯುದ್ಧಕೆ ಕಹಳೆ ಊದಿರುವೆ
ನಿನ್ನೆಡೆ ಬರಲು ಹೆದರಿರುವೆ

ಇರುವೆ ಇರುವೆ ಎಲ್ಲಿರುವೆ
ನೋಡಲು ಚಂದವು ಪುಟ್ಟಿರುವೆ
ಕಾಯಕ ಯೋಗಿಯ ಹೊಲದೊಳಗೆ
ಧಾನ್ಯವ ಹೊತ್ತು ಹೊರಟಿರುವೆ.

– ಚನ್ನಕೇಶವ ಜಿ. ಲಾಳನಕಟ್ಟೆ
        ತುಮಕೂರು ಜಿಲ್ಲೆ